Silvio Gonzato, ambasador i Bashkimit Evropian në Shqipëri, zhvilloi të hënën më 23 shkurt një takim me Haxhi Dede Edmond Brahimaj, Kryegjyshin Botëror Bektashian, të njohur si Baba Mondi.
Gonzato vlerësoi bashkëjetesën paqësore ndërmjet besimeve fetare në Shqipëri si vlerë thelbësore për Bashkimin Evropian dhe shembull për Evropën.
Gjatë takimit diskutuan mënyrat për të forcuar tolerancën, solidaritetin, mbrojtjen e të drejtave të njeriut dhe mosdiskriminimin. Këto përpjekje, sipas Gonzatos, kontribuojnë në rrugën e Shqipërisë drejt anëtarësimit në BE.
"Shqipëria shquhet për bashkëjetesën paqësore ndërmjet besimeve fetare, një vlerë thelbësore edhe për Bashkimin Evropian. Diskutova me Haxhi Dede Baba Edmond Brahimaj, në cilësinë e tij si Kreu i Urdhrit Bektashi dhe Kryetar i Këshillit Ndërfetar të Shqipërisë, për mënyrat se si mund të bashkëpunojmë për të forcuar tolerancën, solidaritetin, mbrojtjen e të drejtave të njeriut dhe mosdiskriminimin, duke kontribuar njëkohësisht në rrugën e Shqipërisë drejt anëtarësimit në Bashkimin Evropian", deklaroi Silvio Gonzato.