Ambasadori i Italisë në Shqipëri, Marco Alberti, zhvilloi një vizitë në qytetin e Korçës, ku mori pjesë në ceremoninë e inaugurimit të Bibliotekës së Fëmijëve “Thoma Turtulli”, pas një procesi të gjerë rikonstruksioni.
Gjatë kësaj vizite, ambasadori iu përgjigj interesimit të medias lidhur me zhvillimet e fundit politike dhe ato në sistemin e drejtësisë. Lidhur me protestat që po zhvillohen prej 117 ditësh, Alberti theksoi se Roma zyrtare po e vëzhgon me kujdes situatën, duke shtuar se përfaqësuesit diplomatikë respektojnë zhvillimet e brendshme dhe nuk u përket atyre të japin gjykime mbi këtë çështje.
Sa i përket çështjes së ish-drejtueses së SHISH, Vlora Hyseni, e cila ndodhet nën masën e arrestit shtëpiak, ambasadori mbajti një qëndrim të rezervuar. Ai sqaroi se mandati i tij përqendrohet në çështjet e bashkëpunimit dypalësh, duke theksuar se nuk mund të japë një mendim për këtë rast specifik.
Në vijim të deklaratave, ambasadori u ndal te marrëdhëniet strategjike mes Italisë dhe Shqipërisë. Sipas Albertit, investimet italiane kanë prekur shifrën e rreth 1 miliard euro. Ai paralajmëroi gjithashtu mundësimin e 600 deri në 700 vendeve të reja të punës, duke e konsideruar forcimin e bashkëpunimit ekonomik si një shtyllë kyçe për rrugëtimin e Shqipërisë drejt anëtarësimit në Bashkimin Evropian.
Sipas diplomatit, Italia është e angazhuar në sektorë prioritarë si inteligjenca artificiale, fusha digjitale dhe industria e mbrojtjes. Qëllimi i këtij bashkëpunimi është krijimi i mundësive që të rinjtë shqiptarë të zhvillojnë karrierën e tyre brenda vendit, duke kontribuar në rritjen dhe zhvillimin ekonomik të Shqipërisë.
Përditësime
Kryebashkiaku i Korçës, Sotiraq Filo, konfirmoi se rikonstruksioni i bibliotekës u mundësua përmes financimit nga Programi Italo-Shqiptar i Konvertimit të Borxhit për Zhvillim (IADSA) dhe Kooperacionit Zviceran, në kuadër të projektit SEMP. Objekti i transformuar tashmë ofron ambiente bashkëkohore dhe teknologji të dedikuar për ndërveprimin e fëmijëve.