Ambasadori italian në Prishtinë, Maurizio Antonini, u takua këtë të premte me ushtruesen e detyrës së presidentes së Kosovës, Albulena Haxhiu, për të diskutuar zhvillimet politike dhe marrëdhëniet dypalëshe. Gjatë takimit, ambasadori theksoi nevojën për formimin sa më të shpejtë të institucioneve të reja, duke kërkuar identifikimin e një kandidati konsensual për postin e presidentit, proces ky që është bërë pengesë për konstituimin e institucioneve pas zgjedhjeve të 7 qershorit.
Në njoftimet zyrtare pas takimit, u bë e ditur se palët trajtuan gjithashtu procesin e optimizimit të KFOR-it dhe çështjen e riintegrimit të gjyqtarëve dhe prokurorëve serbë në sistemin gjyqësor të vendit. Nga ana e saj, Albulena Haxhiu shprehu vlerësimin për mbështetjen e vazhdueshme të Italisë, si në ruajtjen e paqes dhe sigurisë, ashtu edhe në rrugëtimin evropian të Kosovës.
Gjatë bashkëbisedimit, u diskutuan edhe çështje të bashkëpunimit bilateral, ku u përmend pjesëmarrja e palës italiane në ceremoninë e hapjes së Lojërave Mesdhetare në Taranto, si dhe takimi i mëhershëm me presidentin italian Sergio Mattarella.