AMP ekzekuton masa sigurie ndaj 6 policësh dhe një civili për baste sportive

Agjencia e Mbikëqyrjes Policore (Rajoni Elbasan–Korçë) ekzekutoi masat e sigurisë ndaj gjashtë punonjësve të policisë dhe një shtetasi civil, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Elbasan. Veprimet u zhvilluan më 20 janar 2026, në kuadër të operacionit “Last Bet”, pas vendimit penal të Gjykatës së Shkallës së Parë të Juridiksionit të Përgjithshëm Elbasan.

Hetimet zbuluan se të dyshuarit, duke shfrytëzuar funksionet e tyre, në bashkëpunim me njëri-tjetrin, kanë organizuar dhe favorizuar ushtrimin e lojërave të fatit dhe basteve sportive të palejuara. Ata akuzohen për veprat penale “Organizimi ose ushtrimi i veprimtarisë së lojërave të fatit në kundërshtim me ligjin” dhe “Shpërdorim i detyrës”.

Gjatë veprimeve proceduriale u sekuestruan 7 telefona celularë, të cilët dyshohet se janë përdorur për aktivitetin kriminal. Hetimet vazhdojnë.

Masa "Arrest në shtëpi" (neni 237 i Kodit të Procedurës Penale)

• Nënkomisar R.T. (Redon Tafilaku), specialist për krimet, Stacioni i Policisë Manëz, Komisariati i Policisë Durrës.
• Inspektor E.K. (Enea Kapllani), ndihmës specialist/kontrollor, Stacioni i Policisë Kufitare Morinë, Drejtorinë Vendore të Kufirit dhe Migracionit Kukës.
• Shtetasi I.T. (Ilir Tafa), banues në Tiranë.

Masa "Ndalim i daljes jashtë shtetit" dhe "Detyrim për t’u paraqitur në policinë gjyqësore" (nenet 233 dhe 234 i Kodit të Procedurës Penale)

• Komisar D.S. (Denis Sinani), shef i Seksionit për hetimin e krimeve në volum, Komisariati i Policisë Devoll.
• Nënkomisar A.M. (Aldi Molla), përgjegjës turni, Stacioni i Policisë Kufitare Morinë, Drejtorinë Vendore të Kufirit dhe Migracionit Kukës.
• Inspektor G.B. (Gëzim Beqiraj), ndihmës specialist/kontrollor, Stacioni i Policisë Kufitare Morinë, Drejtorinë Vendore të Kufirit dhe Migracionit Kukës.
• Inspektor E.D., trupë shërbimi operacional, Seksioni Special i Ndërhyrjes Taktike, njësi speciale RENEA.