Agjencia e Mbikëqyrjes Policore (AMP), përmes Drejtorisë së Hetimit dhe Drejtorisë Rajonale Vlorë–Gjirokastër, ka ekzekutuar më 24 janar 2026 vendimin e Gjykatës së Posaçme të Shkallës së Parë për Korrupsionin dhe Krimin e Organizuar (GJKKO). Gjykata ka caktuar masën e sigurimit personal me karakter shtrëngues arrest në shtëpi, parashikuar nga neni 237 i Kodit të Procedurës Penale, ndaj tre punonjësve të Stacionit të Policisë Orikum.
Të dyshuarit janë:
• D. L., inspektor krimesh;
• A. J., shef i stacionit;
• A. F., specialist i policimit në zonë.
Sipas hetimeve, këta punonjës policie dyshohen për kryerjen e veprave penale korrupsion pasiv i personave që ushtrojnë funksione publike në bashkëpunim dhe shpërdorim i detyrës, parashikuar nga nenet 259, 248 dhe 25 të Kodit Penal. Në shtator 2025, ata kanë kërkuar dhe marrë nga një shtetas shumën prej 270 000 lekësh, në kundërshtim me ligjin dhe duke keqpërdorur atributet e funksionit, në këmbim të shmangies së përgjegjësisë penale.
Hetimi disamujor është zhvilluar me metoda speciale në drejtim të SPAK-ut dhe ka dokumentuar me prova ligjore implikimin e tyre në veprime korruptive dhe shpërdorim detyre. AMP bën me dije se hetimet vijojnë për zbardhjen e plotë të rrethanave dhe identifikimin e përgjegjësive të tjera të mundshme.
AMP thekson përkushtimin për zbatimin e ligjit dhe fton qytetarët të denoncojnë abuzimet përmes numrave 0800 9090, email-it info@amp.gov.al, WhatsApp 069 41 51 511 ose aplikacionit Agjencia Digjitale.