Agjencia e Mbikëqyrjes Policore (AMP) ka referuar në Prokurorinë e Tiranës materialet procedurale ndaj dy punonjësve të Policisë së Shtetit, të dyshuar për veprën penale të shpërdorimit të detyrës, parashikuar në nenin 248 të Kodit Penal.
Punonjësit e përfshirë janë K. M., ndihmës specialist për hetimin e krimit, dhe S. K., specialist për hetimin e krimit, të dy pranë Komisariatit të Policisë nr. 4 në Tiranë.
Hetimet nisën pas një publikimi në mediat elektronike, ku raportohej se në një objekt shumëkatësh në ndërtim, të situar në rrugën Llukë Kacaj, Njësia Administrative nr. 4, ishin ndërtuar dy kate banimi mbi lejen e miratuar nga Bashkia Tiranë.
Verifikimet e kryera nga strukturat e Policisë së Shtetit konfirmuan se objekti është ndërtuar në tejkalim të lejes, duke kaluar pragun ligjor prej 10% për konfiskim për interes publik, sipas Aktit Normativ nr. 8, datë 1.10.2025.
AMP Rajoni Tiranë ka administruar dokumentacionin shkresor dhe deklarimet e strukturave policore përkatëse. Pas veprimeve paraprake hetimore, ka vendosur referimin e çështjes në prokurori.
Hetimet vijojnë për dokumentimin e plotë të rrethanave.