Policia e Shtetit dhe Inspektorati i Mbrojtjes së Territorit, Bashkia Tiranë, konfiskuan më 13 maj 2026 një objekt banimi dhe shërbimi në rrugën “Llukë Kaçaj”, Njësinë Administrative nr. 4 të Tiranës. Aksioni u zhvillua në bashkëpunim me Drejtorinë e Monitorimit dhe Zbatueshmërisë së Lejeve të Ndërtimit.
Nga verifikimet rezultoi se objekti, i lejuar si godinë 9-katëshe, kishte tejkaluar lejen duke shtuar katin 10, katin 11 dhe një pjesë të katit 12. Gjithashtu, objekti ishte vënë në përdorim pa certifikatë përdorimi. Pallati nuk ka përfunduar plotësisht dhe askush nuk banon ende në të.
Bazuar në Aktin Normativ Nr. 8, datë 1 tetor 2025, tejkalimi ishte mbi pragun ligjor prej 10% të sipërfaqes totale ndërtimore. Kjo parashikon konfiskimin e të gjithë objektit për interes publik ose strehim social, ose prishjen e plotë në rast tejkalimi për qëllime fitimi.
Materialet procedurale i janë referuar Prokurorisë për veprime të mëtejshme. Strukturat e Sektorit për Hetimin e Krimeve Ekonomiko-Financiare në Departamentin e Policisë Kriminale dhe Komisariati Nr. 4 i Tiranës kishin referuar më parë disa raste shkeljesh të lidhura me këtë objekt.
Policia e Shtetit thekson angazhimin për bashkëpunim me agjencitë ligjzbatuese për parandalimin dhe goditjen e ndërtimeve të paligjshme dhe krimeve kundër mjedisit.
Përditësime
Ndërtimi i pallatit 12-katësh u nis nga Sky Construction shpk e M.J., por mbeti i papërfunduar për shkak të problemeve financiare. Punimet i vazhdoi A.Sh., raporton gazetarja Xhensila Kodra për BalkanWeb.