Prokuroria pranë Gjykatës së Shkallës së Parë të Juridiksionit të Përgjithshëm Tiranë ka kërkuar konfiskimin e pasurive të shtetasit Ilber Domi, i arrestuar nga autoritetet gjermane për veprën penale të prodhimit dhe shitjes së lëndëve narkotike, të parashikuar nga neni 283 i Kodit Penal Gjerman. Kjo kërkesë bazohet në procedimin pasuror numer 01 të vitit 2025.
Nga hetimet rezulton se Ilber Domi ishte shpallur më parë në kërkim ndërkombëtar nga Interpol Wiesbaden në Gjermani për veprat penale të trafikut të lëndëve narkotike dhe mbajtjes si dhe shitjes së armëve luftarake dhe municioneve. Veprimtaria kriminale dyshohet të jetë ushtruar gjatë viteve 2019-2020, periudhë e mëparshme krahasuar me investimet në pasuri të paluajtshme. Sipas urdhrit të kërkimit ndërkombëtar, evidentohet përfshirja e tij në disa episode të shitblerjes së lëndëve narkotike, aktivitet që ka gjeneruar të ardhura të konsiderueshme financiare.
Në analizën financiare të detajuar, vlera totale e të ardhurave të faktuara të Ilber Domi dhe familjarëve të tij rezulton më e ulët se vlera e investimeve dhe shpenzimeve të kryera. Kjo krijon dyshimin se pasuritë burojnë nga veprimtaria kriminale. Prokuroria ka arritur në përfundimin se Ilber Domi dhe familjarët e tij janë në pamundësi financiare për të kryer këto investime.
Pasuritë për të cilat kërkohet konfiskimi janë:
- Pasuri e paluajtshme e llojit arë, me sipërfaqe 850 m², e ndodhur në Zall-Herr, Tiranë;
- Pasuri e llojit njësi, me sipërfaqe bruto 98.8 m²;
- Dy poste parkimi, të ndërtuara sipas lejes së ndërtimit për objektin 1-2-9 kate + 1 kat nën tokë, në rrugën Bulevardi Blu, Kamëz.
Kërkesa është paraqitur pranë gjykatës për vendim.