Gjykata e Shkallës së Parë të Juridiksionit të Përgjithshëm Tiranë ka caktuar masën e sigurisë "arrest me burg" për katër shtetasit: Mirsim Jella, Fiqiri Lika, Ferdinand Shtembari dhe Adriatik Shtembari. Masa e sigurisë është vendosur pas kërkesës së Prokurorisë, në kuadër të procedimit penal nr. 3193, të regjistruar më 8 maj 2026.
Sipas hetimeve, të dyshuarit akuzohen për veprën penale "Ndërtim i paligjshëm". Ata kanë tejkaluar parametrat e lejes së ndërtimit për një objekt në rrugën "Llukë Kaçaj", në afërsi të "Spitalit Amerikan 2". Ndërsa leja origjinale parashikonte një objekt me 2 kate nën tokë dhe 9 kate mbi tokë, nga kontrolli ka rezultuar se pallati është ndërtuar me 11 kate mbi tokë. Kjo shkelje ka sjellë shtimin e 2,550 metrave katrorë ndërtim në kundërshtim me projektin e miratuar.
Prokuroria bën të ditur se të dyshuarit kanë ushtruar aktivitet ndërtimor në kundërshtim me legjislacionin në fuqi dhe kanë realizuar shitje në mënyrë informale, me qëllim shmangien e detyrimeve fiskale. Nga analiza e rrethanave të faktit, rezulton se ndërtimi është zhvilluar përgjatë një periudhe disa vjeçare, gjatë së cilës shkeljet kanë qenë të vazhdueshme dhe të dukshme.
Në këto rrethana, Prokuroria ka hapur një pistë hetimi mbi dyshimet për mosveprim nga punonjës ose funksionarë të strukturave të inspektimit të territorit, përkatësisht IMT dhe IKMT. Organi i akuzës dyshon se këto institucione, ndonëse kishin detyrimin ligjor për të kontrolluar dhe ndaluar ndërtimin e paligjshëm, nuk kanë marrë masa administrative apo ndëshkuese për të frenuar shkeljet në terren.