Gjykata e Shkallës së Parë të Juridiksionit të Përgjithshëm në Tiranë ka rrëzuar më 2 prill 2026 masën e pezullimit nga detyra ndaj Rigers Sheqeri, kryeinspektor i Inspektoratit të Mbrojtjes së Territorit (IMT) pranë Bashkisë Tiranë. Vendimi anulon kufizimin e vendosur dy ditë më parë dhe lejon rikthimin e tij në detyrë.
Prokuroria e Tiranës kishte kërkuar dhe marrë masën e pezullimit për Sheqerin dhe juristin Erlion Papa (E.P.), të akuzuar për shpërdorim detyre në bashkëpunim, sipas neneve 248 dhe 25 të Kodit Penal. Ndërsa ndaj shtetasit Pandeli Carapuli (P.C.), të dyshuar për ndërtim të paligjshëm (neni 199/a, paragrafi 3), u caktuan ndalimi i daljes jashtë shtetit dhe detyrimi për paraqitje në polici gjyqësore.
Rrethanat e hetimit
Hetimi zhvillohet në kuadër të procedimit penal Nr. 337/2026, nisur pas kallëzimit të A.A., administrator i shoqërisë AL OIL 2019 shpk. Ai pretendoi se në pronën e kompanisë së tij janë kryer punime të paligjshme nga shoqëria Eurocol sh.p.k., në Njësinë Administrative Farkë, të regjistruara pranë Drejtorisë Vendore të ASHK-Tiranë Rurale 1. Këto punime kanë shkaktuar dëmtime dhe nuk ishin të pajisura me leje ndërtimi.
Inspektorët e IMT Tiranë konstatuan shkeljen me procesverbalin Nr. 8331, datë 29 dhjetor 2025. Megjithatë, Sheqeri, i mbështetur në relacionin e Papa-s, vendosi mbylljen e procedurës pa zbatuar asnjë masë administrative, sipas pretendimeve të Prokurorisë, në kundërshtim me Ligjin për inspektimin dhe mbrojtjen e territorit nga ndërtimet e kundërligjshme.
Pozicioni i IMT-së
IMT ka deklaruar se dokumentacioni për punimet është i rregullt në formë dhe përmbajtje, ekziston bazë ligjore e plotë, ndërhyrja është realizuar në përputhje me lejen e ndërtimit dhe punimet shërbejnë një projekt të miratuar me interes publik.