Gjykata e Shkallës së Parë të Juridiksionit të Përgjithshëm Tiranë caktoi masa sigurimi me kërkesë të Prokurorisë së Tiranës kundër punonjësve të Inspektoratit të Mbrojtjes së Territorit (IMT) pranë Bashkisë Tiranë dhe një sipërmarrësi. Masa u vendos më 31 mars 2026, në kuadër të procedimit penal Nr. 337/2026.
Rigers Sheqeri, kryeinspektor i IMT-së, dhe Erlion Pappa, jurist i të njëjtit institucion, u pezulluan nga ushtrimi i detyrës publike. Ata akuzohen për veprën penale të shpërdorimit të detyrës, të parashikuar nga nenet 248 dhe 25 të Kodit Penal, të kryer në bashkëpunim.
Ndaj Pandeli Carapuli, administrator i shoqërisë “Eurocol” sh.p.k., u caktuan ndalimi i daljes jashtë shtetit dhe detyrimi për t’u paraqitur rregullisht në polici gjyqësore, për veprën penale të ndërtimit të paligjshëm, sipas nenit 199/a, paragrafi 3 të Kodit Penal.
Hetimi filloi pas kallëzimit të A.A., administrator i shoqërisë “AL OIL 2019” sh.p.k., i cili pretendoi dëmtim prone dhe punime ndërtimi pa leje në Njësinë Administrative Farkë, të regjistruar pranë Drejtorisë Vendore të ASHK-Tirana Rurale 1. Punimet përfshinin një konstrukcion mur-betonarme, për të cilin “Eurocol” sh.p.k. nuk kishte leje ndërtimi, pavarësisht lejes për ndërhyrje në infrastrukturë dhe barriera zhurme.
Punonjësit e IMT-së konstatuan shkeljen me Proçesverbalin Nr. 8331, datë 29 dhjetor 2025. Megjithatë, Sheqeri, bazuar në relacionin e Pappës, mbylli procedurën pa zbatuar masat administrative të parashikuara nga neni 5 i ligjit Nr. 9780, datë 16 korrik 2007, “Për inspektimin dhe mbrojtjen e territorit nga ndërtimet e kundërligjshme”. Këto masa përfshinin pezullimin e punimeve, vendosjen e gjobës dhe prishjen e ndërtimit.