Trajneri Carlo Ancelotti ka shpallur listën zyrtare me 26 lojtarë të kombëtares së Brazilit për Kupën e Botës 2026. Ceremonia u zhvillua në Muzeun e së Nesërmes në Rio de Janeiro.
Rikthimi i Neymar përbën lajmin kryesor. Sulmuesi i rikthyer te Santos është përfshirë në skuadër pas dy vitesh e gjysmë mungesë për shkak të dëmtimit të ligamenteve dhe meniskut. Ai ka luajtur 13 ndeshje këtë sezon dhe ka shënuar 6 gola.
Disa lojtarë të rëndësishëm do të mungojnë për shkak të lëndimeve. Éder Militão, Rodrygo, Estêvão dhe Thiago Silva nuk do të jenë pjesë e turneut. Për arsye tekniko-sportive janë lënë jashtë edhe Joelinton, Lucas Beraldo dhe Vitor Roque.
Skuadra braziliane do të grumbullohet më 31 maj dhe do të luajë dy ndeshje miqësore kundër Panamasë dhe Egjiptit. Debutimi në Botëror është planifikuar më 13 qershor kundër Marokut. Brazili do të përballet më pas me Haitin dhe Skocinë në Grupin C.
Ancelotti ka theksuar se asnjë lojtar nuk do të ketë privilegje dhe se vendi i titullarit do të fitohet vetëm në bazë të formës aktuale.