Kombëtarja e Brazilit do ta nisë rrugëtimin e saj në Kupën e Botës FIFA 2026 pa shërbimet e Neymar. Trajneri Carlo Ancelotti njoftoi zyrtarisht se sulmuesi 34-vjeçar nuk do të jetë në formacion për sfidën ndaj Marokut, që zhvillohet të shtunën.
Neymar është duke u përballur me një dëmtim në pulpë, të pësuar pak para fillimit të turneut. Pavarësisht mungesës në ndeshjen e parë, stafi teknik mbetet optimist për rikuperimin e lojtarit. Ancelotti deklaroi se stafi nuk dëshiron të rrezikojë shëndetin e tij dhe se fokusi mbetet në përgatitjen për pjesën tjetër të fazës së grupeve.
“Neymar po punon intensivisht për t'u rikthyer sa më shpejt. Pritshmëria është që ai t'i bashkohet grupit në stërvitje javën e ardhshme,” u shpreh Ancelotti.
Kjo ndeshje shënon debutimin e Carlo Ancelottit si trajner i Brazilit në një Kupë Bote, duke u bërë tekniku i parë i huaj që drejton skuadrën në këtë kompeticion. Përkundër mungesës së Neymar, Ancelotti shprehu besimin se skuadra e tij disponon kualitetin e nevojshëm për të rivalizuar çdo kundërshtar. Brazili dhe Maroku përballen në kuadër të Grupit C, ndërsa tifozët presin që 34-vjeçari të jetë i gatshëm për ndeshjen e dytë ndaj Haitit më 19 qershor ose, në skenarin më të largët, për përballjen e fundit në grup kundër Skocisë.
Përditësime
Stafi mjekësor i ka diagnostikuar Neymar një dëmtim të shkallës së dytë në muskulin e këmbës së djathtë, gjë që rrezikon pjesëmarrjen e tij në të gjithë fazën e grupeve. Për ndeshjen kundër Marokut, trajneri Carlo Ancelotti parashikon kalimin në skemën 4-2-4. Ndërkohë, Federata ka konfirmuar takimet e radhës: kundër Haitit më 20 qershor dhe ndaj Skocisë më 24 qershor.