Kombëtarja shqiptare e futbollit do të përballet me Poloninë më 26 mars në orën 20:45 në Varshavë, në ndeshjen e parë të fazës play-off për kualifikimin në Botërorin 2026. Ky duel është vendimtar për kuqezinjtë, të cilët synojnë një hap drejt kualifikimit kundër një kundërshtari me përvojë të madhe ndërkombëtare.
Trajneri Silvinjo bëri publike listën me 26 lojtarë të grumbulluar për këtë përballje dhe për ndeshjen e mundshme të 31 marsit kundër Ukrainës ose Suedisë. Lista përfshin risi, rikthime dhe mungesa të rëndësishme.
Vlera totale e lojtarëve arrin 95.65 milionë euro, sipas Transfermarkt. Në krye qëndron Anis Mehmeti me 14 milionë euro. Lojtari 24-vjeçar i Ipswich-it në Angli po kalon një formë të mirë, me vlerën e tij të rritur nga 10 milionë euro në 14 milionë euro në pak kohë.
Në "podium" renditen Kristjan Asllani me 13 milionë euro dhe Ernest Muçi me 11 milionë euro. Armando Broja, i cili zbret nga "podiumi", tani vlen 8 milionë euro. Pas tyre vijnë Ismajli, Mitaj, Gjimshiti dhe Myrto Uzuni.
Lojtari me vlerën më të ulët është prurja e re Bujar Pllana me 300 mijë euro, pjesë e Lechia Gdańsk-ut në Poloni. Ai renditet para Naser Aliji-t të Dinamo-s me 350 mijë euro.