Anis Mehmeti, sulmuesi 25-vjeçar shqiptar, ka nisur me paraqitje të mira aventurën te klubi anglez Ipswich Town, ku kaloi në janar nga Bristol City.
Në ndeshjen e fundit të Championship, Ipswich fitoi 2-1 në fushën e Derby County në Pride Park. Të dy golat e fitores erdhën nga asistimet e Mehmetit, i cili luajti si organizator dhe ishte vazhdimisht i rrezikshëm për mbrojtjen kundërshtare. Kjo fitore erdhi pas dy rezultateve jo të mira të mëparshme.
Pas ndeshjes, në intervistë për Sky Sports, Mehmeti deklaroi:
“Ne e dimë që Pride Park është një vend i vështirë dhe duhej të rikuperonim pas dy rezultateve të fundit. Ia dolëm ta bënim këtë. Djemtë ishin këmbëngulës dhe jam i lumtur që morëm tre pikët. Po e shijoj shumë kohën time këtu. Kam ardhur me ambicien që të ngjitemi një kategori më lart me këtë klub të madh. [...] Sipas meje, me shumë mundësi jemi ekipi më i fortë në këtë kampionat.”
Ai theksoi se merr çdo ditë si të vijë, duke u përpjekur të kontribuojë në fitore, dhe se ekipi është besimplotë për objektivin e ngjitjes në Premier League, ndonëse Ipswich mban vendin e tretë në renditje.
Elogjet e trajnerit
Trajneri Kieran McKenna foli me elozhe për Mehmetin, të cilin e kishte kërkuar në janar për ta blerë para skadimit të kontratës me Bristol City:
“Unë mendoj se ai është një lojtar i jashtëzakonshëm. Edhe si person, ai ka treguar shumë uri që të përmirësohet. [...] Ai ka pasur një impakt shumë të mirë.”
McKenna vlerësoi adaptimin e shpejtë të shqiptarit në klub dhe dëshirën e tij për të mësuar dhe ndihmuar ekipin.