Presidenti i Këshillit Evropian, Antonio Costa, zhvilloi një vizitë zyrtare në Beograd, si pjesë e turneut të tij në rajonin e Ballkanit Perëndimor. Pas takimit me presidentin serb Aleksandër Vuçiç, ai konfirmoi se zgjerimi mbetet një nevojë gjeostrategjike për Evropën.
Costa vuri theksin te domosdoshmëria e përshpejtimit të reformave në fushën e sundimit të ligjit. Ai kërkoi zbatimin e plotë të rekomandimeve të Komisionit të Venecias për ligjet që lidhen me gjyqësorin dhe prokurorinë, forcimin e lirisë së medias, si dhe reformimin e legjislacionit zgjedhor në përputhje me sugjerimet e ODIHR-it përpara zgjedhjeve të ardhshme. Gjithashtu, ai kërkoi një proces transparent për përzgjedhjen e anëtarëve të Autoritetit Rregullator për Median Elektronike (REM).
Sipas Costa-s, dialogu ndërmjet Beogradit dhe Prishtinës, si dhe zbatimi i Marrëveshjes së Ohrit, mbeten momente kyçe për marrëdhëniet e fqinjësisë së mirë. Ai theksoi se, ndonëse BE-ja mbetet partneri kryesor tregtar dhe investues i Serbisë, ritmi i përparimit drejt anëtarësimit varet drejtpërdrejt nga vendosmëria e autoriteteve serbe për t'u harmonizuar me politikat e jashtme dhe ato të sigurisë të Bashkimit Evropian.
Nga ana e tij, presidenti Aleksandër Vuçiç u shpreh i gatshëm për të përmbushur kërkesat e Komisionit të Venecias në lidhje me legjislacionin për gjyqësorin, duke konfirmuar angazhimin e vendit për të ecur përpara në procesin integrues.
Përditësime
Kryetari i Këshillit Evropian, Antonio Costa, pas vizitës në Kosovë, ka mbërritur në Beograd. Ai nënvizoi se zgjerimi i Bashkimit Evropian mbështetet në tri prioritete: thellimin e reformave demokratike, përshpejtimin e integrimit ekonomik dhe garantimin e sigurisë rajonale. Costa vlerësoi se dialogu dhe zbatimi i plotë i Marrëveshjes së Ohrit janë çelësi për stabilitetin dhe prosperitetin e Ballkanit Perëndimor.