Presidenti i Këshillit Evropian, Antonio Costa, ka mbërritur në Kosovë në kuadër të turneut të tij në vendet e Ballkanit Perëndimor. Sipas agjendës së bërë publike, takimi me ushtruesen e detyrës së Presidentes, Albulena Haxhiu, është parashikuar të zhvillohet në orën 11:00, ndërsa takimi me kryeministrin në detyrë, Albin Kurti, në orën 11:40. Krahas udhëheqësve institucionalë, Costa pritet të zhvillojë bisedime edhe me krerët e partive politike.
Qëllimi i këtij turi është konfirmimi i mbështetjes së Bashkimit Evropian për rajonin, me theks te procesi i integrimit evropian, reformat demokratike, bashkëpunimi rajonal dhe perspektiva e zgjerimit. Policia e Kosovës ka njoftuar se ka marrë masa të nevojshme të sigurisë dhe rregullimit të trafikut për të mundësuar zhvillimin e këtyre aktiviteteve.
Pas vizitës në Prishtinë, presidenti i Këshillit Evropian do të vazhdojë turneun në Beograd më 4 qershor. Vizitat e tij do të përmbyllen në Mali të Zi, ku do të marrë pjesë në një darkë zyrtare dhe do të bashkëkryesojë Samitin BE–Ballkani Perëndimor në Tivat, më 5 qershor, nën temën "Prosperiteti dhe stabiliteti i përbashkët i Bashkimit Evropian dhe Ballkanit Perëndimor".
Përditësime
Kryetari i Këshillit Evropian, Antonio Costa, viziton Kosovën në kuadër të turit rajonal, pas takimit me kryeministrin e Shqipërisë, Edi Rama. Sipas njoftimit të Presidencës së Kosovës, vizita zyrtare do të nisë në orën 11:00, ndërsa mediat janë udhëzuar për procedurat e marrjes së pamjeve.
Në kuadër të turit rajonal, kryetari i Këshillit Evropian, Antonio Costa, u bëri thirrje liderëve politikë në Kosovë që të arrijnë konsensus për integrimin në BE dhe zbatimin e marrëveshjeve nga dialogu me Serbinë. Gjatë vizitës, Costa u takua me përfaqësuesit e partive opozitare, ndërsa ministrja Albulena Haxhiu e theksoi Planin e Rritjes për Ballkanin Perëndimor si një interes strategjik kombëtar. Gjithashtu, u konfirmua se Antonio Costa dhe Ursula von der Leyen do të bashkëkryesojnë samitin e radhës në Tivat.