Kryeministri në detyrë, Albin Kurti, zhvilloi një takim me Presidentin e Këshillit Evropian, Antonio Costa, i cili po viziton vendet e Ballkanit Perëndimor. Takimi u përqendrua në bashkëpunimin me institucionet e Bashkimit Evropian, sigurinë dhe zhvillimin ekonomik.
Gjatë bisedës, Kurti vuri në dukje progresin që Kosova ka shënuar në reforma, demokraci dhe ekonomi, duke veçuar përmirësimet në sundimin e ligjit, luftën kundër korrupsionit dhe lirinë e mediave. Ai theksoi se vendi gëzon një rritje ekonomike të qëndrueshme, ndër më të shpejtat në rajon, ndërsa falënderoi Bashkimin Evropian si partnerin kryesor zhvillimor të vendit.
Kryeministri në detyrë ritheksoi përkushtimin e qeverisë ndaj zbatimit të reformave që burojnë nga Plani i Rritjes dhe instrumentet e tjera të para-anëtarësimit. Në këtë kuadër, u nënvizua gatishmëria e Kosovës për marrjen e statusit të vendit kandidat dhe hapjen e negociatave për anëtarësim.
Sipas njoftimit zyrtar, Kosova është rreshtuar plotësisht me politikën e jashtme të Bashkimit Evropian, duke dënuar luftën agresive të Federatës Ruse ndaj Ukrainës dhe duke zbatuar të gjitha sanksionet e ndërmarra ndaj Rusisë. Në takim u diskutua gjithashtu për rëndësinë e fqinjësisë së mirë dhe bashkëpunimit rajonal në prag të Samitit BE-Ballkani Perëndimor që do të mbahet në Tivat.
Përditësime
Presidenti i Këshillit Evropian, Antonio Costa, gjatë vizitës së tij në Prishtinë, rikonfirmoi se integrimi evropian i Serbisë varet nga normalizimi i marrëdhënieve me Kosovën dhe zbatimi i plotë i Marrëveshjes së Ohrit. Costa u fokusua në perspektivën e së ardhmes, pa iu referuar masave ndëshkuese për sulmin në Banjskë. Kjo është vizita e dytë e Costës në Kosovë që nga muaji maj.