Kryeministri në detyrë i Kosovës, Albin Kurti, zhvilloi një takim me komisioneren e Bashkimit Evropian për Zgjerim, Marta Kos, në margjinat e Forumit Ekonomik Botëror në Davos të Zvicrës.
Zyra e Kryeministrit ka njoftuar se në takim u diskutua për progresin ekonomik dhe avancimin demokratik të Kosovës, të cilat konsiderohen elemente kyçe në rrugën drejt anëtarësimit në Bashkimin Evropian.
Sipas njoftimit, Albin Kurti theksoi se Raporti i Vendit i Komisionit Evropian për vitin 2025 dëshmon vazhdueshmërinë e progresit të Kosovës në integrimin evropian. Ai vuri në dukje se asnjë vend tjetër i Ballkanit Perëndimor nuk ka qenë më i përgatitur në momentin e marrjes së statusit të vendit kandidat, prandaj progresi demokratik i Kosovës meriton të vlerësohet me këtë status.
Palët diskutuan po ashtu për situatën gjeopolitike, Planin e Rritjes, bashkëpunimin rajonal dhe aktualitetin. Sa i përket bashkëpunimit rajonal, kryeministri Kurti nënvizoi se Kosova luan rol aktiv dhe konstruktiv, si dhe mbështet integrimin më të gjerë ekonomik të rajonit bazuar në vlerat dhe standardet e Bashkimit Evropian.
Aplikimi i Kosovës për anëtarësim në BE u dorëzua në fund të vitit 2022, por nuk ka pasur zhvillime të reja që atëherë, sipas burimeve.
Përditësime
Kryeministri i Kosovës, Albin Kurti, takoi ministrin e Ekonomisë dhe Industrisë të Estonisë, Erkki Keldo, në Davos.
Të dy palët vlerësuan mbështetjen e Estonisë për integrimin euroatlantik të Kosovës, si dhe diskutuan përvojën estoneze në teknologji, shërbime digjitale, inovacion, infrastrukturë dhe energji.