Presidenti i Këshillit Evropian, Antonio Costa, ka nisur sot një tur diplomatik në gjashtë vendet e Ballkanit Perëndimor. Vizita e tij ka filluar në Sarajevë, ku janë zhvilluar takime me liderët institucionalë të Bosnjë dhe Hercegovinës.
Sipas axhendës së parashikuar, më 2 qershor, Costa do të mbërrijë në Tiranë. Në kryeqytetin shqiptar, ai pritet të zhvillojë takime me krerët më të lartë të shtetit, përfshirë kryeministrin Edi Rama dhe presidentin Bajram Begaj. Po ashtu, ai do të takohet me studentët e Kampusit të Tiranës të Kolegjit të Evropës. Pas qëndrimit në Shqipëri, ai do të udhëtojë drejt Shkupit.
Më 3 qershor, Costa do të vizitojë Prishtinën, ku janë planifikuar takime me udhëheqësit institucionalë dhe përfaqësues të partive politike.
Turi diplomatik do të vijojë me vizita në Serbi dhe Mal të Zi. Ky cikël takimesh do të kulmojë më 5 qershor në Tivat, ku do të mbahet Samiti BE-Ballkani Perëndimor. Tema qendrore e këtij samiti, që vjen pas edicionit të mbajtur më parë në Tiranë, do të jetë "Prosperiteti dhe stabiliteti i përbashkët i Bashkimit Evropian dhe Ballkanit Perëndimor".
Përditësime
Në kuadër të turit të tij në Ballkan, Presidenti i Këshillit Evropian Antonio Costa zhvillon sot një takim dypalësh me Kryeministrin Edi Rama. Agjenda parashikon takimin nga ora 11:15 deri në 12:00, pasuar nga një konferencë e përbashkët për shtyp në orën 12:15-12:45. Kjo vizitë pason Samitin e Tivatit dhe takimin e fundit të mbajtur gjashtë muaj më parë në Bruksel.
Presidenti i Këshillit Evropian, António Costa, ka finalizuar axhendën e turit të tij diplomatik në Ballkanin Perëndimor. Vizita përfshin takime dypalëshe në Sarajevë me Kryetaren e Këshillit të Ministrave, Borjana Krišto; në Shkup me Kryeministrin Hristijan Mickoski; dhe në Prishtinë me Kryeministrin Albin Kurti e Ministren e Drejtësisë, Albulena Haxhiu. Në Beograd, më 4 qershor, Costa do të takojë Presidentin Aleksandër Vuçiç, Kryetaren e Parlamentit Ana Brnabiç dhe përfaqësues të shoqërisë civile. Turi mbyllet më 5 qershor në Tivat, ku do t'i bashkohet Presidentes së Komisionit Evropian, Ursula von der Leyen, për një konferencë të përbashkët për shtyp. Duke theksuar rëndësinë e kësaj vizite, Costa deklaroi: 'Momenti është këtu. Tani është koha për rezultate'.
Presidenti i Këshillit Evropian Antonio Costa zgjeroi axhendën e turit të tij ballkanik me takime të nivelit të lartë dhe pjesëmarrje në ceremoni zyrtare. Zhvillimet e fundit përfshijnë:
- Antonio Costa u takua me Albulena Haxhiu, ushtruese e detyrës së presidentes në Kosovë, për të diskutuar stabilitetin politik në rajon.
- Kreu i Këshillit Evropian zhvilloi një takim të ndarë me krerët e partive opozitare në Kosovë.
- Antonio Costa mori pjesë në darkën zyrtare të organizuar nga Presidenti i Malit të Zi, Jakov Milatoviq, në kuadër të shënimit të 20-vjetorit të pavarësisë së vendit.
Kryeministri Edi Rama zhvillon sot në orën 11:00 një takim me Presidentin e Këshillit Evropian, Antonio Costa, i cili ka nisur turin e tij në Ballkan. Përmes një postimi në X, Costa theksoi rëndësinë strategjike të zgjerimit të Bashkimit Evropian. Në kuadër të Samitit të Tivatit, ku liderët do të marrin pjesë në seancën plenare dhe drekën e punës, dokumentet zyrtare konfirmojnë Shqipërinë dhe Malin e Zi si shtetet pararojë në procesin e integrimit evropian.