Një avion i tipit Antonov An-124, një nga më të mëdhenjtë në botë për transportin e mallrave, përfshirë ato ushtarake, mbërriti më 6 maj në Aeroportin Ndërkombëtar të Prishtinës “Adem Jashari”, i cili ndodhet 17 kilometra larg kryeqytetit kosovar.
Fluturimi me regjistrim UR-82008, i prodhimit ukrainas, nuk rezultoi në regjistrat e fluturimeve komerciale online. Arsyeja e saktë e mbërritjes mbetet e panjohur.
Radio Evropa e Lirë (REL) kërkoi informacion nga aeroporti, por nuk mori përgjigje. Ministria e Mbrojtjes e Kosovës deklaroi se nuk ka të dhëna zyrtare për këtë fluturim. Edhe misioni i NATO-s në Kosovë, KFOR, nuk iu përgjigj pyetjeve të REL-it.
Fotografi kosovar Arian Mavriqi dokumentoi uljen e avionit, i cili është parë edhe më parë në Kosovë. Entuziastë të aviacionit vendorë dhe të huaj publikuan foto dhe video, duke aluduar se avioni erdhi nga një bazë ajrore në Gjermani dhe mund të ketë transportuar pajisje ushtarake për KFOR.
Ministria e Mbrojtjes e Gjermanisë nuk komentoi transportet ushtarake specifike, duke theksuar se përgjigjja e saj nuk përbën konfirmim apo mohim. Megjithatë, ajo tha se forcat gjermane përdorin kapacitetet e Antonov Logistics SALIS GmbH për furnizimin në kontekste mbrojtjeje kombëtare, aleance dhe krizash ndërkombëtare.