Komisioni i Prokurimit Publik i ka kërkuar Fondit Shqiptar të Zhvillimit të anulojë procedurën e tenderit me fond limit 540 milionë lekë, rreth 5.5 milionë euro, për përmirësimin funksional dhe estetik të bregdetit të Durrësit.
Autoriteti Kontraktor zbatoi kërkesën në sistemin e prokurimeve publike dhe mori miratim për të vazhduar me rishpalljen e procedurës nga fillimi.
Tenderi kishte objekt kontrate “Investime për infrastrukturën e tregjeve, hapësirave tregtare, multifunksionale, rrugë tregtare në zona model zhvillimi. Faza III Rajonet 1&2: Ndërhyrje për rritjen e ofertës turistike dhe për përmirësimin funksional dhe estetik të bregdetit, Bashkia Durrës”. Procedura u hap më 4 dhjetor 2025 dhe u mbyll më 22 dhjetor 2025.
Arsyeja e anulimit
Ankesa e paraqitur pranë Komisionit të Prokurimit Publik u lidh me vlerësimin e kryer nga Komisioni i Vlerësimit të Ofertave.
Detajet e projektit
Fondi Shqiptar i Zhvillimit parashikon ndërhyrje në një sipërfaqe prej rreth 544 mijë m², nga porti i Durrësit deri te Kavalishenca. Projekti synon të transformojë zonën bregdetare në destinacion turistik, rekreativ dhe urban.
- Zgjerim i plazhit ekzistues.
- Krijim i një parku linear të gjelbër përgjatë bregdetit.
- Zhvillim i hapësirave publike multifunksionale.
- Integrim i infrastrukturave të reja rekreative dhe sportive.
Gjatësia e zonës është rreth 2.8 km, me zgjerim të vijës bregdetare deri në 100 metra drejt detit, për hapësira të reja publike.