Ministri i Infrastrukturës dhe Energjisë, Enea Karakaçi, njoftoi më 27 tetor se kanë përfunduar pesë kilometrat e parë të aksit Kombinat–Ndroq–Plepa, nga Kombinati deri në Pezë. Segmenti është marrë në dorëzim nga Autoriteti Rrugor Shqiptar (ARRSH). Sipas ministrit, është lidhur kontrata për vijimin e punimeve në nëntë kilometrat pasues, ndërsa 10 kilometrat e fundit deri në Plepa janë financuar. Procedura e konkurrimit për këtë pjesë pritet të hapet deri në mesin e nëntorit.
Karakaçi tha se synimi është që kontratat për segmentin e fundit të lidhen në fillim të janarit. Aksi pritet të shërbejë si rrugë alternative drejt Durrësit, veçanërisht gjatë sezonit turistik, si dhe të përmirësojë lidhjen e zonave bujqësore me Tiranën dhe Durrësin. Ministri përmendi gjithashtu zhvillimin ekonomik të zonës dhe rritjen e vlerës së pronave përgjatë rrugës.
Drejtori i ARRSH-së, Ami Kozeli, bëri të ditur se rruga do të jetë e kategorisë C1 dhe do të ketë gjerësi 12,5 metra. Projekti parashikon dy karrexhata, secila me gjerësi 3,75 metra, dy bankina të asfaltuara nga 1,5 metra dhe dy bankina të paasfaltuara nga një metër.
Punimet për urën e re të Beshirit mbi lumin Erzen kanë nisur. Ura do të ndërtohet paralelisht me urën ekzistuese dhe do të jetë 179 metra e gjatë, me gjashtë hapësira: katër prej 30 metrash dhe dy prej 29,5 metrash. Sipas Kozelit, kontrata për ndërtimin e saj është lidhur në korrik dhe parashikon 12 muaj punë. Ai tha se janë kryer piketimet, është liruar sheshi i ndërtimit dhe kontraktori ka nisur punën.
Kozeli tha se dy kontratat për segmentet rrugore të përmendura kanë afat 24-mujor. Sipas tij, ARRSH-ja nuk parashikon vështirësi për përfundimin e kontratave brenda afatit.