Gjykata e Posaçme e Apelit për Korrupsionin dhe Krimin e Organizuar shpalli sot të pafajshme ish-drejtoreshën e Autoritetit Rrugor Shqiptar Sonila Qato. Vendimi lidhet me akuzën e shkeljes së barazisë së pjesëmarrësve në tendera për procedurën e lotit të 7-të të rrugës Kardhiq-Delvinë.
Trupa gjykuese e përbërë nga gjyqtarët Iliriana Olldashi, Engert Pëllumbi dhe Tereza Merkaj ndryshoi vendimin e shkallës së parë për këtë akuzë. Gjykata deklaroi se fakti nuk përbën vepër penale sipas nenit 388 të Kodit të Procedurës Penale.
Përveç Sonila Qatos, të pafajshëm u shpallën edhe Simon Prendi, Elona Gogo dhe Erdit Salillari për të njëjtën akuzë. Për Simon Prendin, gjykata la në fuqi vendimin e mëparshëm lidhur me falsifikimin e dokumenteve, duke vlerësuar gjithashtu se fakti nuk përbën vepër penale.
Hetimi kishte filluar pas kallëzimit të Kontrollit të Lartë të Shtetit. Në dosje ishin përfshirë gjithsej dhjetë persona, mes tyre zyrtarë dhe ish-zyrtarë të ARRSH-së.