Gjykata e Posaçme Kundër Korrupsionit dhe Krimit të Organizuar (GJKKO) shpalli vendimin për gjashtë zyrtarë dhe ish-zyrtarë të Bashkisë së Divjakës, të akuzuar nga SPAK për veprën penale "Shkelja e barazisë së pjesëmarrësve në tendera apo ankande publike". Çështja lidhet me tri procedura tenderimi me një vlerë totale prej rreth 1 milion euro, ku sipas prokurorisë u konstatuan parregullsi që cenonin konkurrencën.
Trupi gjykues, i përbërë nga gjyqtarët Erjon Bani, Bib Ndreca dhe Paulin Çera, zhvilloi gjykimin me procedurën e shkurtuar. Për këtë arsye, dënimi fillestar prej 1 viti burgim për secilin u ul në 8 muaj burgim. Në zbatim të nenit 63 të Kodit Penal, gjykata vendosi pezullimin e vuajtjes së dënimit me burg për të gjithë të pandehurit.
Sipas vendimit nr. 62, datë 28.07.2026, masat e dënimit janë si më poshtë:
- Dorjan Spaho, Sara Xhepa (Doko) dhe Roklejd Malko u dënuan me kryerjen e 120 orëve punë në interes publik, të cilat duhet të përmbushen brenda 6 muajve nën mbikëqyrjen e Shërbimit të Provës.
- Fatos Veliu, Elbareta Nishica dhe Vojsava Leçini u vendosën në shërbim prove për një periudhë 16-mujore. Për këta të fundit, gjykata vendosi gjithashtu heqjen e së drejtës për të ushtruar funksione publike për një periudhë 5-vjeçare.
Gjykata përcaktoi se shpenzimet procedurale do të mbulohen në mënyrë solidare nga të gjashtë të dënuarit. Ky vendim nuk është i formës së prerë dhe palët kanë të drejtën e ankimit në Gjykatën e Apelit të Posaçëm brenda 15 ditëve.