Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet ndaj gjashtë zyrtarëve të Bashkisë Divjakë dhe ka dërguar dosjen për gjykim në Gjykatën e Posaçme kundër Korrupsionit dhe Krimit të Organizuar (GJKKO).
Të pandehur në këtë çështje janë:
- Dorjan Spaho;
- Sara Xhepa (Doko);
- Rokled Malko;
- Fatos Veliu;
- Vojsava Leçini;
- Elbareta Nishica, drejtoreshë e planifikimit të zhvillimit të territorit.
Ndaj tyre është ngritur akuza për veprën penale "shkelje të barazisë në tendera apo ankande publike", e kryer në bashkëpunim. Kjo akuzë lidhet me manipulime në procedurat e prokurimit publik, që kanë favorizuar subjekte të caktuara dhe kanë cënuar konkurrencën e ndershme.
Hetimi ka zbardhur parregullsi në tre procedura tenderimi të zhvilluara nga Bashkia Divjakë, me vlerë totale rreth 1 milion euro. Çështja është zhvilluar si fraksion i një dosjeje tjetër.
GJKKO pritet të hedhë shortin për të caktuar gjyqtarin e hetimit paraprak, i cili do të shqyrtojë dosjen për vijimin e procedurave gjyqësore.