Prokuroria e Posaçme ka depozituar kërkesën për gjykim pranë Gjykatës së Posaçme të Shkallës së Parë për të pandehurit e përfshirë në procedimin penal nr. 280/1 të vitit 2020, përfshirë kryetarin e Bashkisë së Kolonjës, Erion Isai. Hetimet kanë nxjerrë në pah shkelje të procedurave të prokurimit publik të kryera nga Bashkia Kolonjë dhe Autoriteti Rrugor Shqiptar (ARRSH).
Në listën e të pandehurve përfshihen:
• Eljona Mydini, ish-zëvendëskryetare e Bashkisë Kolonjë;
• Ergys Verdho, ish-drejtor i përgjithshëm i ARRSH;
• Erald Elezi, ish-drejtor i Planifikimit Strategjik pranë ARRSH;
• Genti Raça, përgjegjës sektori pranë ARRSH;
• Donikë Shehu, Klarita Konomi, Nikollaq Mihali dhe Erdit Salillari, specialistë pranë ARRSH;
• Erjon Cenko, Engjëll Dine, Ermal Zylfo, Armand Tafil, Muharrem Tartari dhe Shpëtim Liço nga Bashkia Kolonjë;
• Entela Çano, administratore e shoqërisë "A&E Engineering".
Në qendër të hetimeve është procedura e prokurimit për ndërtimin e rrugës Korçë–Ersekë, me një fond limit prej rreth 2.8 miliardë lekësh. Sipas organit të akuzës, Bashkia Kolonjë ka paraqitur dokumentacion që dëshmonte ekzistencën e një projekti, ndërkohë që në realitet nuk ekzistonte një dokument i tillë. Përveç "Shpërdorimit të detyrës" dhe "Shkeljes së barazisë në tendera", ndaj disa të pandehurve rëndon edhe akuza për "Falsifikim dokumentesh".