Gjykata e Apelit ka vërtetuar aktvendimin e Gjykatës Themelore në Prishtinë – Departamenti Special, me të cilin ishin refuzuar kërkesat e mbrojtjes për kundërshtimin e provave dhe hedhjen e aktakuzës ndaj Faruk Mujkës dhe Hysen Muzliukajt. Vendimi i marrë nga shkalla e dytë i hap rrugën vazhdimit të procedurës penale.
Sipas aktakuzës së Prokurorisë Speciale, të akuzuarit dyshohet se kanë kryer veprën penale të keqpërdorimit të detyrës zyrtare lidhur me këmbimin e pronës së ish-Bankosit me pronë private. Në kohën kur dyshohet se ka ndodhur vepra, Faruk Mujka ishte nënkryetar i Komunës së Mitrovicës, ndërsa Hysen Muzliukaj ushtronte detyrën e Drejtorit për Gjeodezi, Kadastër dhe Pronë në të njëjtin institucion.
Krahas kësaj, Faruk Mujka, në cilësinë e ish-kryeshefit ekzekutiv të ndërmarrjes Ibër-Lepenc, përballet me akuzën për mosraportim ose raportim të rremë të pasurisë. Kjo akuzë lidhet me shumën prej 60 mijë e 50 eurove, të cilat u sekuestruan në shtëpinë e tij.
Ankesat e mbrojtësve, avokatëve Xhafer Tahiri dhe Ahmet Tahiri, u konsideruan si të pabazuara nga Gjykata e Apelit. Sipas gjykatës, pretendimet për shkelje të dispozitave ligjore nuk qëndrojnë, pasi aktakuza bazohet në prova të mjaftueshme. Të akuzuarit, të cilët ishin deklaruar të pafajshëm në seancën fillestare të 20 tetorit 2025, do të përballen me gjykimin në vijim.