Gjykata e Apelit ka marrë vendime mbi dy çështje të rëndësishme penale. Në rastin e parë, kolegji i Gjykatës së Apelit, i përbërë nga gjyqtarët Skender Çoçaj, Mentor Hajra dhe Arben Hoti, ka anuluar aktgjykimin e Gjykatës Themelore në Pejë ndaj Kreshnik Halitit. I akuzuari ngarkohet për vrasjen e shokut të tij, M.Z., për shkak të një borxhi prej 77 mijë eurosh më 6 mars 2017. Gjykata e Apelit konstatoi shkelje esenciale të procedurës penale, pasi arsyetimi mbi faktet vendimtare ishte i pamjaftueshëm dhe mungonte analiza e dëshmive dhe e ekspertizave kontradiktore lidhur me gjendjen mendore të të akuzuarit. Në rigjykim, Gjykata Themelore është udhëzuar të administrojë provat dhe të urdhërojë një super-ekspertizë për të vlerësuar shëndetin mendor të të akuzuarit në kohën e ngjarjes. Haliti ishte dënuar më 1 dhjetor 2025 me 19 vjet burgim.
Në një zhvillim tjetër, Gjykata e Apelit ka refuzuar ankesën e Prokurorisë Themelore në Prishtinë, duke lënë në fuqi aktgjykimin e Gjykatës Themelore në Prishtinë të datës 20 janar 2025, për lirimin nga akuza të Bashkim Berishës, ish-drejtor i Njësisë së Auditimit të Brendshëm në Ministrinë e Punëve të Brendshme. Berisha akuzohej se nuk kishte deklaruar një banesë që figuron në emër të bashkëshortes së tij. Kolegji penal i Apelit, në përbërje të Mehmet Ndrecajt, Ferit Osmanit dhe Abdullah Ahmetit, vlerësoi se gjendja faktike ishte vërtetuar drejt nga shkalla e parë dhe nuk janë gjetur shkelje procedurale, duke konfirmuar se nuk është provuar kryerja e veprës penale.