Drejtori i Institutit për Studime të Luftës Hibride Octopus, Arben Fetoshi, ka deklaruar se Serbia po zhvillon një sërë operacionesh hibride për të minuar stabilitetin në rajon. Sipas Fetoshit, autoritetet serbe dështuan në tentativën për të sabotuar samitin BE-Ballkani Perëndimor në Tivat të Malit të Zi, ku u pengua hyrja e 87 personave që synonin të cenonin sigurinë e ngjarjes.
Pas dështimit në Mal të Zi, Fetoshi thekson se operacionet u zhvendosën në veri të Kosovës, me synim ndikimin në integritetin e zgjedhjeve të 7 qershorit. Ai e lidh këtë me provokimet ndaj simbolit “I❤️ Mitrovica”, duke pretenduar se këto veprime janë orkestruar nga BIA serbe dhe Lista Serbe, duke përfshirë figura si Milan Radojeviq dhe Ivan Zaporozhac.
Sipas Fetoshit, kjo strategji është pjesë e projektit të ashtuquajtur “Bota Serbe” dhe ka për qëllim sfidimin e integrimit euro-atlantik. Ai pohon se presidenti i Serbisë, Aleksandër Vuçiq, po përdor mesazhe nacionaliste dhe po tenton të kontrollojë votën e serbëve në Kosovë, duke shfrytëzuar tensionet për të mobilizuar mbështetësit përmes narrativave për “shqiptarizimin” e veriut.