Kryetari i Aleancës për Shqiptarët, Arben Taravari, ka adresuar kritika të forta ndaj përfaqësuesve shqiptarë të koalicionit VLEN në Maqedoninë e Veriut, duke i cilësuar ata si figura dekorative në qeverinë e udhëhequr nga kryeministri Hristijan Mickoski. Në një paraqitje në emisionin Këndi i Debatit në Tëvë1, Taravari vlerësoi se kryeministri maqedonas po shfrytëzon koalicionin si një mjet politik.
Sipas Taravarit, veprimet e fundit të kryeministrit pasqyrojnë një qasje përjashtuese ndaj shqiptarëve. Ai vuri në dukje se në qeverisjet e mëparshme numri i ministrave shqiptarë ishte dukshëm më i lartë. “Në Qeverinë e parë kishin 6 ministra shqiptarë. Tashmë është vetëm një shqiptar. Mickoski me veprime thotë se shqiptarëve ua kam treguar vendin”, është shprehur Taravari.
Kryetari i Aleancës për Shqiptarët rikujtoi rrethanat e krijimit të koalicionit VLEN, duke theksuar se kauza kryesore e tyre për një dekadë kishte qenë largimi i Bashkimit Demokratik për Integrim (BDI) nga qeverisja, gjë që u arrit në vitin 2024. Megjithatë, ai sqaroi se vendimi për t’u larguar nga qeveria erdhi pas ndryshimit të qasjes së ekzekutivit maqedonas lidhur me integrimin e vendit në Bashkimin Evropian dhe për shkak të mungesës së respektit të treguar ndaj partnerëve të koalicionit nga ana e kryeministrit.