Ish-këshilltari i Hashim Thaçit, Ardian Arifaj, në një prononcim për emisionin “Info Magazine” në Klan Kosova, ka folur për marshin e paralajmëruar për datën 12 shtator në mbështetje të ish-drejtuesve të UÇK-së që po përballen me procesin gjyqësor në Hagë.
Arifaj theksoi se ky organizim është konceptuar si një aktivitet gjithëpopullor, ku ftesa u drejtohet të gjithë qytetarëve pa dallime politike. Sipas tij, çështja nuk ka të bëjë vetëm me fatin e Hashim Thaçit, Kadri Veselit, Jakup Krasniqit, Rexhep Selimit dhe të tjerëve, por me të ardhmen dhe narrativën e shtetit të Kosovës.
“Sa di unë janë të ftuar të gjithë dhe nuk di që ka aty diskutime kush me u thirrë e kush mos me u thirrë, sepse marshi është ideuar ashtu që të jetë gjithëpopullor”, u shpreh Arifaj.
Ai paralajmëroi se një vendim i pafavorshëm nga Gjykata Speciale do të mund të ndikonte në mënyrën se si pranohet apo kontestohet shteti i Kosovës në të ardhmen. Ky marsh pritet të shënojë pikën kulmore të një sërë aktivitetesh që kanë nisur tashmë të zhvillohen nëpër komuna të ndryshme të Kosovës.