Kryetari i Aleancës për Ardhmërinë e Kosovës, Ardian Gjini, i ka shprehur ngushëllimet e tij familjes dhe kolegëve të policit Altin Kryeziu. Përmes një postimi në rrjetet sociale, Gjini u shpreh se dhimbja për humbjen e Altin Kryeziut na bashkon të gjithëve.
Altin Kryeziu, me origjinë nga fshati Bubavec i komunës së Malishevës, humbi jetën në Qendrën Klinike Universitare të Kosovës (QKUK). Ai nuk arriti t'u mbijetojë plagëve të marra disa ditë më parë, pasi u godit nga një veturë teksa ishte në kryerje të detyrës zyrtare në Malishevë.
Në mesazhin e tij ngushëllues, Gjini theksoi se kujtimi dhe respekti për shërbimin e të ndjerit në Policinë e Kosovës do të mbeten të përjetshme. Lajmi për vdekjen e policit ka shkaktuar reagime të shumta, duke e vlerësuar lart kontributin e tij në mbrojtje të rendit dhe sigurisë publike.