Avokati Arianit Koci ka reaguar në Facebook kundër pranisë së forcave të shtuara policore, përfshirë Njësinë Speciale, në Skenderaj.
Ai e ka quajtur këtë situatë fyerje jo vetëm për qytetarët e qytetit, por për të gjithë qytetarët e Kosovës. Koci deklaroi se problemet nuk zgjidhen me demonstrim force dhe se dërgimi i njësive të shumta policore nuk shërben për qetësimin e tensionit.
Sipas tij, Skenderaj nuk është qytet që mund të frikësohet me autoblinda apo prezencë të madhe policore, siç e ka dëshmuar shumë herë në të kaluarën. Ai pyeti kush po i dërgon forcat policore kundra vëllezërve të vet.
Koci theksoi nevojën për unitet në këtë kohë, duke kujtuar se Kosova përballet me çështje të hapura me Serbinë, probleme ekonomike, jostabilitet politik dhe sfida të tjera serioze. Energjia dhe vëmendja duhet të përqendrohen aty, jo në përplasje të brendshme.
Ai u bëri thirrje liderëve politikë që të reagojnë menjëherë për të qetësuar situatën dhe për të tërhequr policinë nga Skenderaj. "Liderët, nëse ka e nëse janë të pjekur, duhet të reagojnë menjëherë", përfundoi Koci.