Arkivi Qendror Shtetëror i Filmit ka njoftuar fillimin e punës për restaurimin e filmit të mirënjohur “Dimri i Fundit”, një prej veprave më të rëndësishme të kinematografisë shqiptare. Procesi po kryhet në studion e restaurimit të këtij institucioni nga specialistët audiovizualë Erand Meça dhe Hajrije Dedej, me qëllim ruajtjen dhe rikthimin e veprës në cilësi optimale për publikun. Këtë nismë e ka përshëndetur edhe Kryeministri Edi Rama, i cili e cilësoi filmin si një "gur të çmuar" të trashëgimisë kombëtare.
Filmi “Dimri i Fundit” është një prodhim i vitit 1976 nga Kinostudio “Shqipëria e Re”. Vepra është realizuar me regji të Ibrahim Muçajt dhe Kristaq Mitros, skenar të Nexhati Tafës dhe muzikë të kompozitorit Aleksandër Lalo. Ngjarjet e filmit, të xhiruara në fshatin Dardhë të Korçës, pasqyrojnë sfidat e grave shqiptare gjatë Luftës së Dytë Botërore, të cilat ndihmonin partizanët e plagosur duke u siguruar ushqim në kushte të vështira.
Në kastin e aktorëve bëjnë pjesë figura të shquara të skenës dhe ekranit shqiptar, si Liza Laska, Margarita Xhepa, Dhimitra Plasari, Rajmonda Bulku, Agim Qirjaqi dhe Guljelm Radoja. Pas përfundimit të procesit të restaurimit, vepra do të shfaqet në premierën e saj të re në Kinema Drita.