Blendi Gonxhja, ministër i Turizmit dhe Kulturës, ka njoftuar se Arkivi Qendror Shtetëror i Filmit vijon punën për restaurimin digjital të veprave kryesore të kinematografisë shqiptare.
Aktualisht po restaurohet për herë të parë filmi me metrazh të shkurtër "Fëmijët e saj" (1957), me regji dhe skenar nga Hysen Hakani. Lajmi u bë i ditur përmes një postimi në rrjetet sociale nga vetë ministri.
Procesi përfshin skanimin digjital të materialit filmik origjinal, stabilizimin e imazhit, pastrimin e dëmtimeve fizike, korrigjimin e kontrastit dhe densitetit, si dhe rikuperimin e cilësisë vizuale sa më pranë versionit origjinal. Gjithçka kryhet duke respektuar parimet profesionale për ruajtjen e autenticitetit.
Ministri Gonxhja theksoi rëndësinë e këtij procesi për trashëgiminë kinematografike dhe mundësinë që publiku të shohë klasikët shqiptarë me cilësi të lartë vizuale.
Përditësime
Kinostudioja “Shqipëria e Re” prodhoi filmin shqiptar "Fëmijët e saj" (1957), me muzikë nga Tish Daija. Premiera u mbajt më 22 shkurt 1958 në Tiranë. Filmi u restaurua për herë të parë, pas shfaqjes së filmave të tjerë të restauruar.