Presidenti i Federatës Shqiptare të Futbollit (FSHF), Armand Duka, ka zhvilluar një takim me arbitrat dhe asistentët e Kategorisë së Parë, në kuadër të përgatitjeve për sezonin e ri futbollistik. Në këtë takim ishin të pranishëm edhe drejtori i Departamentit të Arbitrimit në FSHF, Bernardino González Vázquez, si dhe kryetari i Bashkimit të Arbitrave Shqiptarë të Futbollit, Tahir Kastrati.
Në fjalën e tij, Duka theksoi rolin qendror të arbitrit në fushë, duke nënvizuar se ai mban përgjegjësinë kryesore për mbarëvajtjen e ndeshjes dhe zbatimin e rregullave, pavarësisht kategorisë ku arbitrohet. Kreu i FSHF-së kërkoi nga arbitrat që të tregojnë profesionalizëm maksimal si në ndeshjet e niveleve të larta, ashtu edhe në ato amatore, duke i konsideruar ato si gara dhe mundësi edukimi.
Një pjesë e rëndësishme e takimit iu kushtua zbatimit të rregullave të reja për këtë kampionat. Duka kërkoi respektim të plotë të tyre, duke theksuar se një rregull i parespektuar është më problematik se një rregull i pavënë. Ai u bëri thirrje arbitrave që të funksionojnë si një skuadër e bashkuar për të arritur suksesin, duke u mbështetur te puna e Komitetit të Arbitrimit.
Lidhur me masat ndaj shkeljeve, presidenti deklaroi se nuk do të ketë dënime publike për çështje teknike, por paralajmëroi aplikimin e pezullimeve afatgjata apo të përhershme për shkelje disiplinore. Duka sqaroi se ndëshkimet do të jenë individuale, me qëllim që pasojat e gabimeve të një personi të mos ndikojnë mbi gjithë trupën e arbitrimit. Takimi u mbyll me urimet e kreut të federatës për një edicion sa më të suksesshëm dhe me sa më pak gabime.