Në prag të nisjes së fazës Final Four në Abissnet Superiore, më 15 maj, në Shtëpinë e Futbollit u zhvillua një takim me grupin e arbitrave, arbitrat asistentë dhe arbitrat VAR të përzgjedhur për ndeshjet vendimtare të sezonit.
Në këtë takim ishte i pranishëm presidenti i FSHF, Armand Duka, i cili vlerësoi rëndësinë e kësaj faze finale dhe rolin e arbitrimit në garantimin e standardeve më të larta sportive.
Sektori i Arbitrimit ka përzgjedhur një grup arbitrash dhe asistentësh me eksperiencë për të drejtuar ndeshjet e Final Four. Gjatë takimit u diskutua mbi rëndësinë dhe përgjegjësinë që mbart kjo fazë e kampionatit, duke pasur parasysh formatin dhe nivelin e lartë konkurrues të saj.
Fokusi i mbledhjes u vendos edhe në aspektin teknik të vendimmarrjes në fushë. Gjatë analizës u shqyrtuan disa raste dhe situata të ndryshme të arbitrimit, të cilat kanë qenë objekt komentesh dhe diskutimesh jo vetëm në Abissnet Superiore, por edhe në kampionate të ndryshme ndërkombëtare.
Nëpërmjet këtyre takimeve teknike dhe përgatitore, FSHF synon të garantojë standarde sa më të larta organizimi dhe arbitrimi për ndeshjet e Final Four, që pritet të sjellin emocione dhe rivalitet të fortë në stadiumin Air Albania.