Kryetarja e Autoritetit të Mediave Audiovizive (AMA), Armela Krasniqi, ka reaguar pas aksidentit tragjik të ndodhur më 3 maj në Durrës, ku dy të mitur humbën jetën pasi u përplasën nga një automjet, ndërsa një tjetër mbeti i plagosur rëndë dhe u dërgua në Spitalin e Traumës në Tiranë për ndihmë të specializuar.
Në një postim në rrjetet sociale, Krasniqi kritikoi ashpër mënyrën e raportimit të mediave. Ajo shkroi: "Mjaft! Kjo që po ndodh nuk është gazetari – është abuzim me dhimbjen njerëzore. Nuk është informim kur dhuna, tragjedia dhe fatkeqësia kthehen në uri për klikime."
Krasniqi u bëri thirrje gazetarëve dhe drejtuesve të mediave të tregojnë përgjegjësi profesionale, duke shmangur transmetimin e pamjeve të aksidentit dhe ekspozimin e panevojshëm të traumës. "Të 'vrasësh' dhe rivrasësh, të ekspozosh plagë të hapura dhe të ushqesh publikun me ulërima dhimbjeje dhe tronditjen njerëzore, është shkelje e rëndë e etikës dhe e çdo standardi", nënvizoi ajo.
Ajo theksoi se gazetarët nuk janë vetëm transmetues lajmesh, por formues të ndërgjegjes publike. "Çdo fjalë e papërgjegjshme lëndon, çdo titull i tepruar dëmton, çdo kufi i kaluar rrënon besimin te ju", shkroi Krasniqi.
Në fund, ajo kërkoi respektimin e dinjitetit të viktimave dhe familjeve të tyre: "Respektoni dinjitetin! Mbroni viktimat. Ndani informacion, jo traumë. Nëse gazetaria humbet njerëzoren, ajo humbet gjithçka."
Përditësime
ABC News Albania siguroi pamjet e rënda të aksidentit në Durrës, por vendosi t'i mos i publikojë në asnjë platformë të saj.