Aksidenti në Durrës lë dy fëmijë të vdekur dhe një të plagosur rëndë

Në Durrës, më 3 maj 2026, ndodhi një aksident rrugor ku humbën jetën dy fëmijë të moshës 10 vjeç, ndërsa një fëmijë i tretë ndodhet në gjendje të rëndë në Spitalin e Traumës në Tiranë. Dy të rritur mbetën të lënduar lehtë.

Reagimi i Kryeministrit Rama

Kryeministri Edi Rama, i cili ndodhet në Erevan të Armenisë për takimin e Komunitetit Politik Europian, shkroi në platformën X:

«Sapo kemi zbritur në Erevan të Armenisë për Komunitetin Politik Europian dhe kam mësuar për tragjedinë e pangushëllueshme të humbjes së dy fëmijëve, ndërkohë që fëmija i tretë lufton për jetën nën kujdesin e mjekëve. Zoti bekoftë dy shpirtrat e vegjël, u dhëntë forcën e jashtëzakonshme prindërve për t’i mbijetuar dhimbjes së madhe, ndërkohë që bashkohem në lutjet për shërimin e fëmijës në spital».

Në një postim të dytë, Rama theksoi:

«Ndërsa i gjithë vendi është në pikëllim për këtë ngjarje dhe drejtësia bën punën e saj me autorin, është detyrë e të gjithëve, po veçanërisht e mediave e portaleve, të tregojnë vetëpërmbajtje, ndjeshmëri dhe përgjegjësi. Publikimi apo shpërndarja e pamjeve të rënda nuk informon, por vetëm shton dhimbjen e atyre që po përballen me një humbje të pakthyeshme dhe e hienizon botën e informacionit. Respekti për dinjitetin njerëzor dhe dhimbjen e familjeve duhet të jetë mbi çdo sensacion apo klikim».

Reagimet e tjera

Presidenti Bajram Begaj shprehu ngushëllime për familjet e viktimave dhe uroj shërim fëmijës të plagosur. Ai kërkoi hetim shterues, masa për rritjen e sigurisë në qarkullimin rrugor dhe përgjegjësi më të madhe nga qytetarët.

Kreu i grupit parlamentar socialist, Taulant Balla, e cilësoi ngjarjen jo si aksident rrugor, por si akt terrorist, duke thënë se autori nuk është një shofer i thjeshtë, por terrorist.

Autoritetet po vijojnë hetimet për rrethanat e ngjarjes.