Përparim Rama, kryetari i Komunës së Prishtinës, reagoi më 26 tetor pas vrasjes së Arlinda Zekajt në Pejë. Ai e cilësoi ngjarjen si tragjedi të rëndë njerëzore dhe alarm për mënyrën se si institucionet trajtojnë sigurinë dhe dinjitetin e grave.
Në një postim në Facebook, Rama tha se Zekaj kishte kërkuar mbrojtje dhe kishte paralajmëruar për rrezikun që i kanosej. Sipas tij, kjo kërkon hetim të plotë të krimit dhe shqyrtim të çdo veprimi ose mosveprimi institucional që i parapriu vrasjes.
Rama tha se siguria e çdo vajze dhe gruaje në Kosovë nuk duhet të varet nga fati, rrethanat apo gatishmëria individuale e një zyrtari për të reaguar, por duhet të jetë garanci e shtetit. Ai e shprehu shqetësimin edhe në aspektin personal, duke thënë se ka vendosur që vajza e tij të jetojë dhe të ndërtojë të ardhmen në Kosovë.
Ai bëri thirrje që shoqëria të refuzojë normalizimin e dhunës ndaj grave, ndërsa institucionet të ndërtojnë mekanizma që reagojnë me kohë, me përgjegjësi dhe pa kompromis.
Në postim, Rama shkroi se nuk mund të pretendohet se po ndërtohet një shoqëri e drejtë, për sa kohë gratë vazhdojnë të kërkojnë mbrojtje dhe viktimat vazhdojnë të numërohen. Ai shprehu ngushëllime për familjen e Zekajt.