Presidenti i Republikës, Bajram Begaj, reagoi për aksidentin e ndodhur mesditën e 3 majit në Durrës, ku humbën jetën dy fëmijë dhe një i tretë mbeti i plagosur rëndë. Ngjarja ndodhi në zonën e ish-Kënetës, ku fëmijët po luanin me top në trotuar dhe u goditën nga një automjet.
Sipas disa burimeve, drejtuesi i automjetit ishte nën ndikimin e alkoolit, ndërsa dy të rritur u lënduan lehtë në të njëjtën ngjarje.
Në një postim në rrjetet sociale, Bajram Begaj shkroi: "I tronditur thellë për aksidentin e tmerrshëm në Durrës, ku humbën jetën dy vogëlushë dhe një tjetër u plagos shumë rëndë. Lutem me përunjësi për shpirtrat e tyre! Ngushëllimet e mia më të sinqerta për prindërit dhe familjarët e dy engjëjve të vegjël. Uroj shërim për fëmijën që ndodhet i shtruar në spital."
Kreu i shtetit bëri thirrje për institucionet përgjegjëse: "Të marrin masa për rritjen e sigurisë në qarkullim, të bëjnë një hetim shterues për ngjarjen dhe qytetarët të rrisin përgjegjësinë për zbatimin e ligjit. Jeta dhe siguria e qytetarëve është e shenjtë."