Operacioni policor, i koduar “Premtimi”, u finalizua në datën 4 shtator 2026, pas hetimeve që nisën pas denoncimeve të qytetarëve në emisionin investigativ “STOP”. Sipas autoriteteve, dy gratë mashtronin qytetarët duke u garantuar se mund të zgjidhnin problemet e pronësisë falë njohjeve që kishin pranë Agjencisë Shtetërore të Kadastrës (AShK).
Në këmbim të këtyre premtimeve, të dyshuarat përvetësonin shuma të mëdha parash dhe pajisnin qytetarët me certifikata pronësie që dyshohet se janë të falsifikuara. Gjatë kontrollit, policia sekuestroi një sasi të konsiderueshme eurosh, dokumente të falsifikuara dhe dy telefona celularë.
Prokuroria pranë Gjykatës së Shkallës së Parë të Juridiksionit të Përgjithshëm Tiranë ka nisur hetimet për dy të dyshuarat për veprat penale:
• “Mashtrimi”
• “Falsifikimi i dokumenteve”
• “Përvetësimi i titullit apo detyrës shtetërore”
Autoritetet njoftuan se hetimet janë në vijim për të identifikuar nëse ka raste të tjera të ngjashme ku qytetarët mund të kenë rënë pre e kësaj skeme mashtrimi.
Përditësime
Policia identifikoi dy të dyshuarat e operacionit “Premtimi”. Suzana Doda, 58 vjeçe, është arrestuar, ndërsa Sara Ndoj, 27 vjeçe, po hetohet në gjendje të lirë. Hetimet e deritanishme konfirmojnë se shuma totale e përvetësuar nga skema e mashtrimit me pronat kap vlerën e mbi 100 mijë eurove.