Shërbimet e Policisë së Shtetit arrestuan dy persona në Tiranë dhe Krujë për veprimtarinë e prodhimit dhe shitjes së lëndëve narkotike. Aksioni u zhvillua më 15 prill 2026 nga Komisariati i Policisë Nr. 3, Komisariati i Policisë Krujë dhe Seksioni për Hetimin e Narkotikëve i Drejtorisë Vendore të Policisë Tiranë.
Të arrestuarit janë A. K., 30 vjeç, banues në Tiranë, dhe A. M., 19 vjeç, banues në Krujë. Shërbimet policore ndaluan automjetin e drejtuar nga 30-vjeçari në rrugën Mine Peza, ku gjetën sasi të lëndës së dyshuar narkotike kokainë. Më pas, në banesën ku A. K. jetonte me qira, u gjet sasi tjetër kokaine, e cila dyshohet se posedohej me qëllim shitjen.
Sa i përket 19-vjeçarit, kontrolli në banesën e tij në Krujë nxori 256 gramë lëndë të dyshuar narkotike cannabis sativa, e cila dyshohet se do të shitej në qytetin e Krujës.
Policia sekuestroi sasitë e lëndëve narkotike, celularët e të arrestuarve dhe automjetin e përdorur nga 30-vjeçari. Materialet procedurale iu referuan Prokurorisë pranë Gjykatës për veprën penale "Prodhimi dhe shitja e narkotikëve".