Shërbimet e policisë së Tiranës kanë finalizuar operacionin e koduar "Cargo", në bashkëpunim me Seksionin për Hetimin e Narkotikëve dhe Seksionin e Forcës së Posaçme Operacionale.
Gjatë kontrollit në fshatin Luz të Fushë Krujës, më 15 janar 2026, u ndalua automjeti i drejtuar nga shtetasi Afrim Meça, 52 vjeç, banues në Krujë. Në të u gjetën 6 thasë me lëndë të dyshuar kanabis sativa, me peshë totale 60 kilogramë.
Nga hetimet dyshohet se lënda narkotike, me vlerë rreth 60 000 euro, do të shitej në doza të vogla në qytetet e Krujës dhe Tiranës. Si provë materiale u sekuestruan lënda narkotike, automjeti dhe një celular.
Materialet procedurale i kaluan Prokurorisë për veprën penale "Prodhimi dhe shitja e narkotikëve". Hetimet vijojnë për dokumentimin e plotë të veprimtarisë dhe identifikimin e shtetasve të tjerë të përfshirë.