Strukturat e Drejtorisë Vendore të Policisë Korçë, në bashkëpunim me Drejtorinë e Kufirit dhe Migracionit Korçë, nën drejtimin e Prokurorisë, finalizuan operacionin policor të koduar “Gorica” për goditjen e trafikimit të lëndëve narkotike.
Në bazë të informacioneve operative për një automjet me targa greke që do të transportonte drogë drejt Maqedonisë së Veriut me destinacion final Greqinë, policia organizoi shërbime dhe ndoqi mjetin. Automjeti u paraqit në dalje të Pikës së Kalimit Kufitar Goricë. Gjatë kontrollit kufitar, bazuar në analizën e rrezikut, mjeti kaloi në vijën e dytë dhe u skanua.
Në një hapësirë të modifikuar në pjesën e poshtme të automjetit u gjetën 37 pako me lëndë narkotike cannabis sativa, me peshë totale rreth 34 kg. Si rezultat, u arrestuan në flagrancë drejtuesi Thomas Kathreptis, 48 vjeç, dhe pasagjerja Antiopi Marinou, 34 vjeçe, banues në Greqi, për veprën penale të trafikimit të narkotikëve të kryer në bashkëpunim.
Në cilësinë e provës materiale u sekuestruan lënda narkotike, automjeti, dy telefona celularë dhe një shumë parash në euro. Vijojnë hetimet për identifikimin e personave të tjerë të implikuar. Materialet iu referuan Prokurorisë së Korçës.