Njësitet e Stacionit Policor Jugu në Prishtinë kanë arrestuar dy persona të dyshuar për përfshirje në disa raste të vjedhjeve të rënda të ndodhura në Kryeqytet.
Personat e dyshuar janë identifikuar falë veprimeve operative dhe hetimore nga njësitet e stacionit Jugu dhe, si rezultat i këtyre veprimeve, janë ndaluar dhe arrestuar. Të dyshuarit janë A.B., 21 vjeç, dhe A.M., 26 vjeç, të dy shtetas të Republikës së Kosovës.
Me vendim të Prokurorit të Shtetit, të dyshuarit janë intervistuar dhe janë dërguar në mbajtje për 48 orë.
Policia e Kosovës thekson se mbetet e përkushtuar në parandalimin dhe luftimin e veprave penale, si dhe në garantimin e rendit dhe sigurisë për qytetarët.