Shërbimet e Komisariatit të Policisë Pogradec, në bashkëpunim me strukturat e Komisariatit të Policisë Kurbin, kanë finalizuar operacionin policor të koduar Argjendaria për zbardhjen e tentativës së vjedhjes së një argjendarie në lagjen nr. 5 të Pogradecit.
Si rezultat i hetimeve, u arrestuan në flagrancë Klajdi Tuga, 23 vjeç, dhe Bledart Milla, 22 vjeç, banorë në Mamurras të Laçit, për veprën penale vjedhja e kryer në bashkëpunim dhe e mbetur në tentativë.
Nga provat e grumbulluara, dyshohet se të arrestuarit, më 20 mars 2026, në bashkëpunim me persona të tjerë, tentuan të hapin me forcë qepënin dhe të thyejnë xhamin e derës hyrëse të argjendarisë në pronësi të shtetasit L. A., por nuk arritën të marrin asnjë send.
Një shtetas 29-vjeçar u procedua penalisht për veprën penale veprime që pengojnë zbulimin e së vërtetës, pa u bërë me dije emri për arsye hetimore.
Materialet procedurale iu referuan Prokurorisë së Korçës për veprime të mëtejshme, ndërsa grupi hetimor vijon punën për dokumentimin e plotë të ngjarjes.