Gjatë procesit zgjedhor, Policia e Kosovës ndërmori një aksion në fshatin Gorazhdec të Pejës, pas informacioneve për aktivitete që cenonin integritetin e votimit. Si pasojë, u arrestuan Millosh Dimitrijeviq dhe Ranko Zdravkoviq, të cilët dyshohen për veprën penale “Dhënia ose marrja e ryshfetit lidhur me votimin”, me qëllim orientimin e qytetarëve për të votuar për Listën Serbe.
Sipas të dhënave zyrtare, Millosh Dimitrijeviq është ish-kryetar i të ashtuquajturave “organe të përkohshme” të komunës paralele në Pejë dhe anëtar i Partisë Socialiste të Serbisë (SPS). Ndërsa Ranko Zdravkoviq njihet si ish-anëtar i bordit menaxhues të komunës paralele, kryetar i SPS-së për komunën e Pejës dhe aktualisht shërben si anëtar i Këshillit Lokal për Siguri në Bashkësi (KLSB) në Gorazhdec.
Hetuesit rajonalë kanë kryer bastisje në lokacionet e dyshuara për të zbardhur rastin. Ndaj të arrestuarve është caktuar masa e ndalimit prej 48 orësh. Policia e Kosovës ka ritheksuar përkushtimin për mbrojtjen e vullnetit të lirë të qytetarëve dhe u ka bërë thirrje atyre të raportojnë çdo tentativë për parregullsi apo presion gjatë votimit. Sipas legjislacionit, veprat që lidhen me ryshfetin në procesin zgjedhor dënohen me burgim nga një deri në pesë vjet.