Policia italiane ka arrestuar katër shqiptarë të dyshuar për aktivitet kriminal në veri të vendit. Ata akuzohen se ishin pjesë e një bande të quajtur skifterave, e angazhuar në vjedhje banesash në provincat e Bergamos, Pordenones, Venecias dhe Udines.
Mes të arrestuarve është Aldi Gjetani, 30 vjeç, punonjës i një locali, i cili u kap pas një aksidenti rrugor dhe kishte dy urdhër-arreste kundër tij. Pas përfundimit të dënimit, atij i është vendosur masa e dëbimit. Silvano Marku, një tjetër anëtar, ndodhet në paraburgim në burgun e Lodit për vjedhje të tjera dhe nuk ka dhënë detaje gjatë pyetjeve, duke thënë se nuk i kujtonte rrethanat.
Banda akuzohet për vjedhje banesash, marrje të mallrave të vjedhura, riciklim të targave të automjeteve dhe rezistencë ndaj policisë. Hetimet tregojnë se grupi kishte lidhje me qarqe kriminale të njohura dhe financohej nga aktivitete mashtruese. Sipas autoriteteve, ata kanë kryer mbi 70 vjedhje, me vlerë totale rreth 181 mijë euro.
Përgjimet telefonike kanë zbuluar se anëtarët kishin frikë nga reagimi i banorëve gjatë vjedhjeve dhe përdornin armë për mbrojtje. Gjithashtu, evidentohet konsumimi i kokainës për të kapërcyer frikën. Gjykata ka theksuar rrezikun e lartë për arratisje dhe përsëritje të veprave penale.
Dy organizatorë të tjerë janë shpallur në kërkim. Hetimet vazhdojnë për kapjen e tyre dhe dokumentimin e plotë të aktivitetit kriminal të grupit.